世間上有千千萬萬種聲音，唔知邊種最好聽同最難聽呢？最好聽就暫時未知喇，不過美國一項實驗證明，小朋友哭鬧聲係全世界最難聽嘅聲音。

美國新帕爾茨大學一位教授進行咗一項實驗，參與者喺聆聽一連串噪音嘅同時，要計一啲簡單嘅數，然後再測試邊一種噪音最容易令人分心。喺實驗過程入面，團隊會陸續播放唔同嘅聲音，例如機器運轉嘅聲音、演講、女仔扮可愛嘅嗲聲等等，最後發現小朋友嘅喊聲係最令人分心，令到參與者回答數學題目嘅時候得分最低。學者指出，無論成年人係咪育有小朋友都好，BB嘅喊聲都被認為係佢哋最憎聽到嘅聲音。