各位喺香港長大嘅朋友唔知有冇聽過一個地方叫做芽菜坑村？我嘅印象是喺香港島大坑半山上一個失落嘅部落，細個經常去住喺上面嘅朋友屋企玩，一條長長嘅樓梯，生銹嘅牌匾，好多奇形怪狀嘅木屋同鐵皮屋，好多天真嘅小朋友，不同類型嘅昆蟲和好似手指公般長度嘅螞蟻，感覺就好像宮崎俊創作嘅動畫片段一樣夢幻。落雨嘅時候會漏水，仲會擔心山泥傾瀉。我仲記得問我朋友個爸爸佢仲同我講，間鐵皮屋係佢自己起，鄰居家長同小朋友關係十分之和睦，感覺就像一個大家庭。可惜歲月就是神偷不知不覺已失去了聯絡，甚至乎條村已經被政府收回了，祝我兒時朋友及長輩們安好。

我亦都有聽聞佢哋已經搬咗上樓可能係私樓，公屋或居屋，我就無從稽考。仲記得佢爸爸同我講當年係用咗一筆小錢就可以起到呢個鐵皮屋，反觀現在正有一個部落比鐵皮屋更加失落就係劏房和籠屋！政府有一個數據話大概約有廿十萬個劏房戶，就當呢個數字係正確亦都唔係一件驕傲嘅事。

我自己有好多來自大陸各個城市嘅朋友，佢哋對香港嘅印象就係劏房！覺得我哋香港人好可憐。最諷刺嘅是我哋香港人居然係世界上最長命嘅一群，唔通住得舒唔舒服真係唔會影響壽命？甚至添福添壽？佢哋冇當年村民咁好運可以用政府未有用嘅土地一手一腳起自己嘅部落，現在只可以用一種另類嘅方法在社會上寄居和生存。

可以為自己嘅社會自豪首先要令基層人士活得有尊嚴，公營房屋嘅上樓時間實在太長，人民在水深火熱之中，基層劏房戶優先公屋刻不容緩！萬億資產一早已經成為世界之最。金錢係一個載體，識得用就係一個工具，相反唔識得用，有同冇有咩分別？

分配畀佢哋嘅唔係只係一個藏身之所而係畀佢哋幾代人嘅一個機會可以重拾尊嚴，重新出發。將基層應該畀劏房業主嘅租金轉化為一個使社會向上的最大籌碼。